لو عايزة ابنك يبطل مص صوابعه.. اربطيها

بواسطه علياء المحمدى الأربعاء , 4 أكتوبر 2017 ,9:43 ص

لو عايزة ابنك يبطل مص صوابعه اربطيها


مص الاصابع عادة بتبقى عند الاطفال من وهما رضع وبتزيد بعد الفطام، علشان يعوضوا بيها الرضاعة، واحيانا بيعملوا كده في مرحلة التسنين بسبب الالم، ده لانها بتعطي احساس بالراحة والهدوء، الا ان لها مخاطر كبيرة جدًا، زي نقل الميكروبات والجراثيم، واختلال في نمو الاسنان، وغيرها، ولو عايزة تعلمي ابنك يبطلها، لهلوبة هتقولك على مجموعة نصايح تعمليها، وهي:

 

- تشتيت التركيز:

اشغلي طفلك في نشاط بيحبه ويستهويه، يستخدم فيه ايده الاتنين، ويستحوذ على كل تركيزه. 

 

- ربط الأصابع:

لو الطفل صغير وممكن تسيطري عليه أكتر، اربطي اصبعه، بشريط طبي مثلا، المهم تكون حاجة غير مضرة للطفل، وفي نفس الوقت يبقى ملمسها وطعمها غير مستحب بحيث ينفر منها.

 

- النقاش:

اتكلمي مع طفلك، ولو كان سنه كبير شوية، قوليله ان العادة دي هتبقى مصدر انتقاد له، على الاقل يحاول يتجنبها طول اليوم وقدام الناس. 

 

- استخدمي الليمون:

بانك تعصريه على صوابع طفلك الصغير علشان تنفريه من الحركة دي، خصوصا انه آمن، وليس له اي تأثير سلبي على ابنك. 

 

- التشجيع:

كافئي الطفل في كل مرة يبعد عن العادة دي، بانك تديله حاجة حلوة، او تعملي له حاجة مميزة، ده هيشجعه اكتر على الاستمرار.

 

- فهمي الطفل انه كبر:

وراعي ان كلامك يكون بعيد عن صيغة الشكوى او التقليل منه، الطريقة دي بتشجعه وتجعله يبطلها من نفسه. 

 

- البدايل:

لو الطفل بيمص صوابعه علشان يعوض احساس الأمان بتاع الرضاعة، عوضيه عن ده بالأحضان او انك تديله مصاصة، بونبوني، اي حاجة يمصها بدل صوابعه.

 

- التجاهل:

التركيز الزايد مع الطفل ممكن يأدي للعند فيها، لكن لو وجهتيه بالراحة، واتجاهلتيها بعد كده، مع الوقت هنلاحظ انه بيبعد عنها بنفسه، خصوصا لو كان من الاطفال اللي بتعملها بغرض جذب الانتباه. 



قولى رأيك

تابعنا علي فيسبوك