8 علامات بتدل على نقص الميه في جسمك

بواسطه روضة إبراهيم السبت , 11 نوفمبر 2017 ,5:45 م

8 علامات بتدل على نقص الميه في جسمك


الميه تعتبر شيء اساسي ومهم جدا لجسم الانسان، بالاضافة الى ان شرب الميه بكميات كبيرة بتقينا من الامراض، وبتجعل الجسم رطب، وبتأثر على البشرة ومش بيجعلها جافة، وده لانها بتشكل 75% تقريبًا من اجسامنا، وفي فصل الشتا بنلاحظ ان كمية الميه اللي بنشربها بتكون قليلة جدًا وده بيأثر على شكلنا في الفصل ده، وعلشان تعرفي الميه في جسمك قليلة ولا مناسبة، لهلوبة هتقولك علامات بتنبهك وبتلفت نظرك انك مش بتشربي كتير خلال يومك، ولازم تحذري منها.

- شفايف جافة:
من العلامات القوية والواضحة انك مش بتشربي ميه كتير، هي الشفايف الجافة وغير الرطبة، بمجرد ما تلاحظي ان شفايفك ناشفة دايمًا اجري اشربي ميه كتير.

- تغيير لون البول:
بصرف النظر عن فكرة الاحساس بالعطش، وان فمك ناشف بتفكرك انك تشربي ميه، ولكن كمان تغير لون البول دي من العلامات الواضحة ان الميه في جسمك قليلة، يعني لو البول لونه اصفر غامق ده دليل ان جسمك جاف، ولو لونه اصفر فاتح ده دليل انك جسمك رطب وبيحتوي على ميه كافية، وفي الوقت ده ينصح بالتقليل من ممارسة الانشطة البدنية، وابعدي عن التعرض للشمس فترة طويلة، وينصح بتناول 4 اكواب ميه على الاقل يوميًا.

- الجلد المجعد:
لو لاحظتي في وقت ان جلد بشرتك مجعد وخشن وجاف جدًا يبقى ده دليل ان جسمك محتاج ميه كتير، يعني مهما ترطبي جسمك بكريمات برده مش بيتأثر بحاجة، لازم الترطيب الداخلي بالميه.
وفي دليل تاني ان جسمك بيفتقر للميه، لو لاحظتي وجود حكة في جسمك او بقع حمرا والتهابات بسبب جفافه، او مكون على الجلد قشرة، ده دليل قوي انك لازم تشربي ميه كتير لأن كده جسمك مش صحي.

- الاحساس بالجوع كتير:
لو كنتي لسه واكله من شوية وحسيتي بالجوع برده، يبقى ده علامة من علامات انك عطشانة ومحتاجة تشربي، لان ساعات الجسم بيترجم الاحساس غلط، لو جسمك ناقصه ميه كتير مهما تاكلي ممكن تحسي بجوع وده دليل انك محتاجة تشربي ميه كتير.

- الشعور بالتعب:
لو كنتي دايمًا بتحسي بتعب شديد من غير ما تبذلي مجهود كبير، وبتستغربي انا ليه مجهدة ومرهقة كده يبقى ده دليل انك جسمك محتاج ميه كتير ولازم تشربي، وكمان ينصح بالتقليل من شرب المنبهات زي القهوة، لان الكافيين بيساعد في ادرار البول وبالتالي الجسم بيفقد ميه اكتر.

- تشنجات العضلات:
لو كنتي رياضية وبتمارسي انشطة بدنية كتير ودايمًا بيحصلك تشنجات في العضلات، يبقى دي علامة ان جسمك محتاج ميه ولازم تشربي كتير علشان تتجنبي التشنجات دي واللي بتصيبك بالألم، لان العضلات بيدخل في تكونها الميه.

- زيادة معدل ضربات القلب:
لو جسمك نقصه سوايل كتير، بنلاحظ ان بيحصل اضطرابات في ضربات القلب، وده لان نسيج القلب بيتكون من 90% من الميه، ولما بيتحرم الجسم من الميه بيحصل لخبطة وزيادة في ضربات القلب.

- صداع مستمر:
كل جهاز في الجسم بيحتاج لكميه ميه معينة، والدماغ والحبل الشوكي بتحتاج كمية ميه كتير، ولو حصل نقصان في الكمية دي ده بيأدي للشعور بالصداع المستمر، لان لما الميه بتنقص من الدماغ دي حاجة خطر وبتعطي انذار بوجود صداع مستمر لحد ما تشربي ميه كافيه.

ملحوظة:
هل تعلمي انك ممكن تقعدي 6 اسابيع من غير اكل وتفضلي عايشة، لكن لا يمكن تقعدي اكتر من اسبوع من غير شرب ميه، وده دليل ان الميه مهم جدًا لاجسامنا.



قولى رأيك

تابعنا علي فيسبوك