نضفي بيتك قبل العيد بمنتجات طبيعية

بواسطه شيرين مصطفى الاحد , 20 أغسطس 2017 ,10:34 ص

نضفي بيتك قبل العيد بمنتجات طبيعية


المنظفات الكيمياوية على الرغم من فعاليتها في التنضيف، الا انها ممكن تضر جلدك خصوصًا لو استخدمتيها بشكل مستمر، ولان لهلوبة عندها الحل لكل حاجة فجابتلك منظفات طبيعية تقدري تنضفي بيها بيتك من غير ما تضري نفسك وكمان توفري فلوسك وتحافظي عليها.

1- الليمون:

مطهر رائع وفعال في ازالة الزيوت والدهون وبقع الصابون من الارضيات وبيحمي الاسطح من تكون البكتيريا عليها ، كمان هو معطر طبيعي للجو، علشان كده يعتبر من افضل البدايل لمنظفات المطبخ والحمام.

- ممكن تستخدميه في تنضيف الميكروويف، عن طريق اضافة 3 ملاعق كبيرة من عصير الليمون لـ 400 ملل ميه في طبق ودخليه الميكروويف، بعدين شغليه واتركي المنظف لمدة 10 دقايق وشوفي النتيجة.

- الحنفيات المجيرة من اثار بقع الصابون افركيها بنص ليمونة هتلاقيها رجعت لمعت من تاني، وممكن تنضفي ارضية الحمام والمطبخ بنفس الطريقة.

- افركي بيه الاسماك واللحوم والفراخ وبعدين اشطفيها بالميه العادية، الطريقة دي هتخلصك من الريحة اللي بتبقى فيهم.

2- الخل:
يعتبر بديل لمنظف الزجاج والشبابيك والارضيات، وممكن علشان ريحته النفاذة تضيفي له نقط من زيت اللافندر هينضف ويديكي ريحة حلوة في نفس الوقت .

- ضيفي ملعقة كبيرة من الخل للتر ميه وصبي الخليط في ازازة بخاخة، ونضفي بيه المرايات والشبابيك.

- رشي الخل على ارضيات الحمام واتركيه لمدة 10 دقايق، بعدين اغسليه بميه نضيفة.

- سخنيه وبلي قماشة بيه كويس ولفيها على الدش لمدة نص ساعة بعدين انزعيها واغسلي المكان بالميه، والحوض رشي عليه الخل وافركيه بالفرشاة هتلاقيه نضف ورجع كانه جديد.

3- الملح والبيكينج صودا:

يعتبر مزيل للبقع وممكن تستخدميه في المطبخ والحمام ولتنضيف الادوات الصحية.

- انقعي فوط المطبخ او اي اسفنجة بتستخدميها للتنضيف في ميه بملح واتركيهم فترة بعدين اغسليهم.

- علشان تتخلصي من الروايح الكريهة في التلاجة قبل ما تنضفيها رشي شوية ملح على بواقي  السفن اب الموجودة عندك  وامسحي بيهم التلاجة من بره وجوه.

- لو عايزة تنضفي السجادة رشي عليها ملح وبعدين ميه بسيطة، واتركيها  نص ساعة او لحد ما تنشف خالص وبعدين اشفطي الملح بالمكنسة، والطريقة التانية بالبيكينج صودا رشيها على السجادة وافركيها بالراحة بالفرشة وبعدين اشفطيها من على السجادة بالمكنسة او نفضيها.

4- بودرة المسطردة:

تعتبر بديل فعال جدا لمنظف الاطباق لانها بتساعد في التخلص من الدهون والزيوت، كل اللي هتعمليه انك هتضيفي ½ ملعقة صغيرة منها على 2 لتر ميه سخنة وصبيهم في اي ازازة فاضية عندك واستخدميها في غسل الاطباق.

5- زيت الزيتون:

يعتبر بديل لمنظف الاثاث والخشب والمنتجات الجلد.

- بلي قماشة او فوطة نضيفة بزيت الزيتون وامسحي بيه الاثاث المصنوع من الجلد والارضيات والاسطحة الخشبية.

- لو عايزة تتخلصي من اي خدش على الاسطح والاثاث الخشب، اخلطي ½ كوباية زيت زيتون مع ½ كوباية خل وامسحي بيهم مكان الخدش هتلاقيه اختفى، ولو كان كبيرممكن تكرري التجربة تاني لحد لما يختفي اثر الخدش تماما.



قولى رأيك

تابعنا علي فيسبوك