صدقي ولا تصدقي.. في ألم الضهر

بواسطه علياء المحمدى الأربعاء , 11 أكتوبر 2017 ,10:08 ص

صدقي ولا تصدقي في ألم الضهر


شباب، كبار، في إصابة أو لأ، 8 من 10 أشخاص على الأقل لازم يعانوا من آلام الضهر وفي الوقت ده بنسمع خرافات كتير ونصايح متداولة بين الناس وغير معروف صحتها من عدمه، علشان كده لهلوبة بتقولك بلاش تصدقي اي حاجة واعرفي الصح من الغلط في السطور الجاية. 

 

اوعي تصدقي ان: 

- القعدة بضهر مفرود: 

ناس بتقولك ان القعدة دي، مع ارخاء الضهر أو انحنائه ممكن يسبب مشاكل كتير، الحقيقة ان الانسان الطبيعي لازم ينوع في جلسته، والقعدة المثالية هي تقديم الرجل شوية وتريحي ضهرك تمامًا على ضهر الكرسي، وفي كل الحالات يفضل تبعدي عن الجلوس الكتير، وتنوعي بين الوقوف والحركة. 

 

- اوعي ترفعي حاجة تقيلة: 

في ناس هوايتهم رفع الأثقال، الفكرة مش في شيل حاجات تقيلة أو لأ، الفكرة في الرفع بطريقة صحيحة علشان نتجنب أذية الضهر، والطريقة الافضل لرفع الاحمال عموما من أول كيلو لحد 100 كيلو وزيادة هي القرب من الشيء والانحناء بشكل صحيح، والرفع ببطء مع الحرص على عدم لوي أو تني الضهر.

 

- النوم في السرير علاج الضهر: 

بالعكس في حالات النوم ليها ممكن يأخرها، لكن في حالة الاصابة القريبة طبعًا الدكتور بينصح بالراحة في السرير ووقتها بتبقى مبررة وصحية.

 

- ألم الضهر لازم ينتج عن إصابة: 

الانزلاق الغضروفي، تعب الفقرات، الأمراض الباطنية والتلوث الناتج عن عدوى وأسباب كتير جدا ممكن تكون سبب في الم الضهر مش بس الوقوع أو الصدمات. 

 

- المراتب الناشفة مفيدة أكتر: 

النوم على مراتب متوسطة الصلابة بتساعد على مرونة الحركة اكتر من الصلبة اللي ممكن تسبب ألم في الضهر اصلا، وعلى كل الاحوال يفضل يكون الاختيار حسب عاداتك في النوم.

 

- الشخص الرفيع عمره ما بيعاني من ألم الضهر: 

ورغم ان الوزن التقيل بيضغط على الضهر مش معنى كده إنه مش بيصيب الرفيعين، على سبيل المثال الناس اللي عندها مرض التجويع "Anorexia "، وبرغم ان وزنهم أقل من الطبيعي، الا انهم بيعانوا من ضعف العظام وبالتالي ممكن عضمهم يتكسر بسهولة أو فقرات الضهر تتآكل، وده ممكن يصيب أي حد عضمه كثافته ضعيفة.

 

- الرياضة خطر على الضهر المتألم: 

التعود على التمرينات الرياضية الخفيفة بيمنع بشكل كبير الاحساس بالألم، الدكاترة بينصحوا المرضى اللي بيعانوا من ألم اسفل الضهر بالتمرينات الخفيفة وبعد زوال الألم بيبقى فيه خطة للتمرينات أقوى بالتدريج علشان الاصابة متتكررش تاني.

 

صدقي أن: 

- الوزن الزيادة يساوي ألم زيادة: 

اللياقة البدنية طبعًا مهمة جدا وبتخفف عن الضهر حمل كبير، والسمنة بتضيف حمل أكبر على الضهر وضغط أكتر، علشان كدة ألم الضهر منتشر أكتر بين الناس اللي بيفتقروا للياقة البدنية.

 

- تقويم العمود الفقري مفيد: 

الاطباء في امريكا اقروا ان تقويم العمود الفقري بديل جيد جدًا لعمليات العمود الفقري في حالات كتير، والعلاج بيبقى عن طريق المساج والتدليك أو التقويم بطريقة معينة للفقرات.

 

- العلاج بالابر بيقلل الألم: 

في نوع معين منها بتستخدم للعلاج بالوخز، وهي مساوية لليوجا والاسترخاء.




قولى رأيك

تابعنا علي فيسبوك