ازاي تجاوبي على اسئلة طفلك المحرجة

بواسطه علياء المحمدى الخميس , 30 مايو 2019 ,2:58 م

ازاي تجاوبي على اسئلة طفلك المحرجة


الأطفال اول ما بيتولدوا بكونوا في حالة اكتشاف دايم للعالم وده بيكون معلوماتهم وشخصياتهم، واهم وسيلة ليهم هي الاسئلة بعد الملاحظة بنفسه، وطبعا بما انهم عايزين يعرفوا كل حاجة ساعات كتير اسئلتهم بتبقى محرجة للاب والام، علشان كده لهلوبة بتقدملك الطريقة المثالية اللي تجاوبي بيها عليهم.

- انا جيت ازاي؟:

اول سؤال بيسأله الطفل واكتر سؤال محرج لاهله ومش بيعرفوا يقولوا فيه ايه، الاجابة الانسب له، انك تقولي انت اتعملت في بطني وكبرت فيها لحد ما وصل الوقت انك تطلع منها للدنيا.

- هو انتي لازم تروحي الشغل؟:

لو انتي ام عاملة بتلاقي ولادك بيزعلوا كل ما تنزلي، ويسئلوكي اذا كان ده ضروري ولازم ياخدك منه؟ السؤال هنا مش استفهامي قد ما هو استنكاري لانه عايزك ديمًا معاه، لازم تفهمي ده كويس وحاولي توصليله انك مش قاصدة تحرميه منك، وقوليله ان صورته معاكي طول الوقت.

- هو احنا اغنيا؟:

معظم الأطفال لا يعرفوا يعني ايه غنى او فقر بس لو سمع الكلمة ممكن يسأل فيها، وبيكون عايز يعرف هل تنطبق عليه ولا لأ؟ في الحالة دي لازم تسئليه عن معناها بالنسبة له وساعتها تقدري تجاويبيه الاجابة المناسبة وتفهميه ان حالتكم المادية كويسة وان البيت غني طول ما اهله بيحبوا بعض وهكذا.

- هو انا ليه مفيش حد بيحبني؟:

طبعا لما الاهل بيسمعوا الكلمة دي من طفلهم بيبقى اول رد ان ده مش حقيقي وان كل الناس بتحبك، لكن الصح انك تسئليه ليه بتقول كده؟ مين قال او حسسك بكده؟ علشان تعرفي القصة ورا السؤال لان وارد يكون في حد فعلا اتصرف معاه بشكل عدائي او نوع معين من التربية بيحسسه انه غير مرغوب فيه.

- هو احنا هنموت؟:

مع اول مرة يتعرض فيها الطفل لحقيقة الموت بيبدأ يطرح اسئلة لا نهائية عن الموضوع ويطمن على كل افراد العيلة بما فيهم نفسه اذا كانوا هيموتوا ولا لأ، وقتها لازم تحاولي تسيطري على انفعالاتك وعواطفك وتجاوبيه بشكل عاقل عن الموضوع وتطمنيه ان ده طبيعي لكل انسان، اما عن سؤال "ايه اللي بيحصل لما بنموت؟" حاولي تبدأي اجابتك بطريقة علمية بمعنى انك تقولي للطفل قلبنا وعقلنا بيبطلوا يشتغلوا وابعدي عن الكلام العاطفي المبالغ فيه اللي ممكن يخوفه.

- هو انتي وبابا بتتخانقوا ليه؟:

لما بيشوف خلاف بين الاهل طبيعي يسأل عن السبب، حاولي تفهميه ان ده مش معناه انكم بتكرهوا بعض ولا تقوليله مين غلطان، بس عرفيه ان الناس لما بتقضي وقت مع بعض بيحصل بينهم ساعات سوء تفاهم بس بيرجعوا لبعض تاني، وساعات الطفل بياخد المواضيع لمستوى اعلى وتلاقيه يسألك "هو انتم هتطلقوا؟" فهميه ان مفيش حاجة بتوصل للطلاق، بس على اي حال الخلاف بسيط وان علاقتك بباباه كويسة.

- هو انتي بتبوسي بابا ليه؟/بتنامي جنبه ليه؟

طبعا لو شاف اهله في وضع حميمي لازم يسأل ده ليه، وصلي في اجابتك ان الناس لما بيحبوا بعض بيبقوا عايزين يقربوا من بعض زي ما انتي بتحضنيه وبتبوسيه، ولو سئل بجرأة اكتر وقالك الكلمة بصراحة، اوعي تكدبي او تألفي قصص عليه قوليله ان فعلا ده حقيقي لكن احنا غلطنا علشان عرضناك لموقف زي ده وقوليله انك هتكلميه في الموضوع ده بعدين.

- ماما بتحب مين اكتر؟:

الطفل لما بيبقى عنده اخوات بيخاف ان الاهل يحبوا حد اكتر منه ودايما بيقولك السؤال ده كتير، والاجابة انك تقوليله تفتكر مين؟ علشان لو قالك انه حاسس انك بتفضلي حد عليه تعرفي السبب وتوصليله العكس.



قولى رأيك

تابعنا علي فيسبوك