من جامعة هارفرد..6 اسرار لتربية اطفالك على تحمل المسؤولية

بواسطه إسراء صادق السبت , 7 يوليو 2018 ,9:48 ص

من جامعة هارفرد 6 اسرار لتربية اطفالك على تحمل المسؤولية


من جامعة هارفرد..6 اسرار لتربية اطفالك على تحمل المسؤولية، كل الامهات والاباء بيتمنوا ولادهم يبقوا اشخاص اسوياء ويمكن احسن منهم، وكل اسرة بتتبع مجموعة من التعاملات مع اولادها علشان توصل للهدف ده، اما جامعة "هارفرد" الامريكية قدمت عدة نصايح عامة في التربية تجعل الابناء يتصفون بالمسؤلية والايجابية، وكانت النصايح كالتالي: 
 

1- علموا اطفالكم السيطرة على انفعالاتهم: 

اذا كانت المشاعر السلبية زي الضيق والحزن وخيبة الامل قادرة تأثر علينا كبالغين، لسه قدامنا فرصة لتعليم ولادنا ازاي يسيطروا على انفعالتهم من غير اهدار المزيد من الطاقة على المشاعر دي. 
 
ومن الوسايل المساعدة تعويدهم على اخذ نفس عميق عن طريق الانف وملأ الرئة والبطن بالهواء مع العد ببطء حتى 5، واخراج الهواء عن طريق الفم بنفس التدرج مع العد، النشاط ده بيساعد على الاسترخاء واخراج الطاقة السلبية. 
 

2- كلموهم عن المسؤلية: 

باللسان بانك تكلمي اطفالك عن تحمل المسؤولية واحكي لهم حكايات ومواقف، وبالفعل بانك تعملي ده قدامهم وتلفتي نظرهم في مواقف معينة ازاي الشخص ممكن يشيل المسؤلية ويساعد غيره وتأثير ده. 
 

3- ربي عندهم الشعور برغبة مساعدة الآخريين:

كلمي ولادك دايمًا عن اهمية الشعور بمن حولهم، ابدأي معاهم بدايرتهم الصغيرة، زي الرفق بزملائهم في الفصل خاصة الجدد، وبعدين ابدأي وسعي الدايرة واسأليهم ازاي ممكن يساعدوا الاطفال في بلاد بتاعني من المجاعات وحاجات شبيهة، ده بيربي عندهم مسؤولية وانسانية في تكوينهم.
 

4- علموهم التعبير عن امتنانهم للآخرين: 

لازم نربي عند الطفل القدرة على التعبير عن الامتنان والشكر لمن حوله على اي خدمة او حتى حاجة بسيطة بتتقدم له، زي شكر الجدة على اكلة حلوة، وده في المستقبل بيجعل منهم اشخاص معترفين بالجميل قادرين على التعبير عن مشاعرهم لشريك حياتهم في المستقبل، وكمان الدراسات اثبتت ان الاشخاص المعبرين عن امتنانهم ومشاعرهم اكثر صحة.
  

5- الاهتمام باخلاقهم بقدر الاهتمام بدراستهم:

معظم الآباء بيهتموا بشدة بنجاح ابنائهم في الدراسة او الرياضة، الافضل كمان ان يكون في نفس الاهتمام بالقيم الخاصة بكل اسرة والتأكد من تطبيقها في تعاملات حياتهم، زي مثلا ازاي يتصرفوا وهم ماشيين في الشارع او ازاي يتصرفوا مع حد ضايقهم في المدرسة.   
 

6- تقضية وقت كبير معاهم كالاصدقاء:

حاولي تفرغي جزء كبير من وقتك لاطفالك وبلاش يبقى معظمه نصايح او توبيخ، لازم يكون فيه جزء علشان تحكوا مع بعض زي الاصدقاء وانتي كمان تحكي له عن بعض اسرارك وتحمليه مسؤولية حفظها. 



قولى رأيك

تابعنا علي فيسبوك