شريف مدكور:  "أنا شايف أني شخص لهلوب والرجالة اللي ما بتساعدش في شغل البيت فرافير"

بواسطه روضة إبراهيم وإسراء صادق الأربعاء , 21 مارس 2018 ,9:36 ص

شريف مدكور:  "أنا شايف أني شخص لهلوب والرجالة أللي ما بتساعدش في شغل ا


الإعلامي شريف مدكور، واحد من أشهر الإعلامين الذي تميزوا في تقديم البرامج التي تهم المرأة وتناقش مشاكل الأسرة والتربية والجمال ووصفات المطبخ البسيطة غير المكلفة، ولم يغفل فقرة الموضة وعروض الأزياء وتقديم الفتيات التي تصنع مشغولات يدوية دقيقة ليبرز موهبتهم وفنهم، فهو داعم دائمًا للنساء، لذا كان لـ"لهلوبة" نظرة في حوارها معه، فكان حديثنا معه عن الموضة والجمال والديكور والنظام الغذائي الذي يسير عليه للحصول على جسم رشيق ومثالي، كما حدثنا عن فقرة الطبخ التي لازمته في جميع البرامج التي قدمها، وحبه لتقديم وصفات طبخ بمكونات بسيطة وموفرة بديلة عن اللحم والدجاج والأسماك، وكل هذا وأكثر سيكشفه لنا شريف مدكور في حواره مع "لهلوبة" على جزئين.

 

هل تحب اختيار ملابسك أن تكون على أحدث صيحات الموضة؟

- بحب لبسي يبقى شبه شريف، وعمري ما هشوف حد لابس حاجة هنزل أجيب زيها، والموضة العالمية مش مناسبة ليا.. أنا ماليش دعوة بالموضة أنا ليا دعوة بالحاجة اللي بتناسبني، وبحس دايمًا أن الهدوم بتحبني لما بلبسها فبيبقى شكلي فيها كويس.

الملابس الموضة التي لا تتناسب مع شريف مدكور؟

- مابعرفش ألبس البنطلونات الأسكيني الماسكة أوي ومابعرفش ألبس البدل الجديدة مش هعرف أتحرك وما بتناسبنيش فبلبس البدل القديمة.

هل ترى أن الكعب العالي رمز للأنوثة؟

- أنا بكره الكعب العالي وصوته بينرفزني جدًا.. أنا مش عارف أنتوا بتلبسوا الكعب العالي إزاي ضهركوا مش بيوجعكوا!؟، وفي ستات وهما لابسين الكعب العالي شكلهم حلو لكن دول مش في مصر لأن الكعب العالي عايز جسم بمواصفات معينة تلبسه.

ما هي ملابس السيدات التي تفضلها؟

- أنا بحب جدًا البنت تلبس فستان وجيب، مثل فساتين سعاد حسني وفاتن حمامة المنفوشة بحس فيها أنوثة، والفساتين الفلوري الصيفي.

لماذا ابتعدت السيدات عن ارتداء الفساتين واتجهت إلى ارتداء البناطيل من وجهة نظرك؟

- لأن لو واحدة لبست فستان في الشارع بتبقى قلقانة وتقول خلينا في البنطلون، لكن في بلاد برا بيركبوا المواصلات بالجيب القصيرة والفساتين وببروحوا وبيجوا ولا حد بيبوصلهم.

ما هي الملابس التراثية المصرية التقليدية التي تحب أن ترتديها السيدات؟

- أنا بحب الستات تلبس ملابس تراثية لكن المجتمع المصري معندهوش زي قومي أو تراثي موحد نلبسه في أعيدانا، زي ملابس الهند والسودان والمغرب وتونس وغيرهم.

ما هي الموضة النسائية التي ظهرت ولم تفضلها؟

- في موضة المناكير الأسود والأزرق والأخضر دي موضة مش مقتنع بيها ومش حاببها ومش فاهمها.. وموضة الميكب الأسموكي وحش جدًا.

من هي السيدة الجميلة من وجهة نظرك؟

- هي اللي مش عايزة تظهر جمالها، وبتتميز بروح جميلة ومابتحطش ماكياج كتير، وعندها ثقة في نفسها وما بتقلدش أي ست زيها، وهي ألألي عندها شخصية.

ما رأيك في السيدات التي تهمل في نفسها من أجل شغل البيت وتربية الأطفال؟

- الست المصرية هي الوحيدة في العالم اللي بتهمل في نفسها علشان بيتها وزوجها والعيال، ودي مصيبة أرتكبتها في حق نفسها.

متى تلجأ السيدة لعمليات التجميل؟

- لو الست بصت في المراية وأتضايقت من نفسها وحست بوجود تجاعيد أو أي شيء يعيب جمالها يمكن أن تلجأ إلى عمليات التجميل.. بس أنا مش مع ده أوي غير لو هي مضايقة أو حصل عيب في الوش بس أنا ضد إن واحدة تحاول تصغر في نفسها لأن كل سن وله جماله.

هل ممكن تلجأ لإجراء عمليات تجميل؟

- الواحد لازم دايمًا يكون عند ثقة في نفسه وراضي بكل حاجة ربنا أدهاله، وأنا راضي بكل الديفوهات اللي فيا، ومش هعمل عملية في مناخيري لأنها عجباني كده ومبسوط بالشعر الأبيض مع أني مذيع بتاع فاشون ورقص بس أنا مش هعمل عملية تجميل علشان أنا مبسوط كده.

اشرحلنا علاقتك بالمطبخ؟

- أنا ما بعرفش أطبخ وما بحبش المطبخ وماعنديش خلق أعمل أي أكلة رغم أني عندي فقرة طبخ ثابتة ورئيسية وبرامج الطبخ هي اللي شهرتني أصلًا، أنا لو دخلت المطبخ لازم كل حاجة تبقى نضيفة، وهقعد وقت كبير أوي علشان كل ما أوسخ حاجة لازم أغسلها، لكن أنا بعرف أسخن وأقدم طبق شكله يفتح النفس ومتزوق، وماما ما بتحبش المطبخ نهائي.

من خلال خبرتك في فقرات الطبخ، هل ترى أن الأشخاص يفضلون الأكل الجاهز ولا البيتي؟

- الجاهز للأسف علشان متزوق وشكله حلو، وده اللي خلانا بقينا رقم 5 على مستوى العالم في السمنة والبدانة.

المصريين يفضلون أي مطبخ عالمي؟

- المصرين بيحبوا المطبخ الإيطالي وعلى رأسهم المكرونة بالبشاميل، وكمان بيحبوا الأكل التركي زي المحشي، وبعده الأكل الشامي، وفي مطابخ تانية كتير المصريين مايعرفوهاش.

ما هي الأكلة الغربية التي تفضلها؟

- السوشي، طول عمري بحب أي حاجة طالعة من البحر وما حبش السمك يتحط عليه بهارات، يادوب السمك يتنضف ويتشوح، علشان كده السوشي بالنسبة لي لازم يكون ني تمامًا.

هل قومت بغسل المواعين من قبل؟

- بغسل المواعين طبعًا، وممكن أنضف المطبخ وأخليه فلة، والراجل المفروض يعمل كل حاجة.

ما رأيك في الرجال الذين يرفضون المساعدة في شغل البيت؟

- فرافير، هما بيقولوا عليا أنا فرفور بس هما اللي فرافير، وأنا بعرف أعمل كل حاجة ومش مكسوف، لأن تنضيف المطبخ رياضة، وأنا شايف أني شخص لهلوب وسريع.

هل فقرة المطبخ في برنامجك مع فكرة تقديم الأكلات الموفرة؟

- بقالي 9 شهور تقريبًا مش بنعمل ولا فراخ و لا لحمة ولا سمك وبنعمل بدائل ليهم علشان غليوا، بنفس القيمة الغذائية العالية والسعر أقل، لأن وظيفة الإعلام أنها ما تعقدش الناس، برامج الطبخ مش بيراعوا الغلي وبيعقدوا الناس، في شيف بدون ذكر اسمه جايب استكوزة للناس الكيلو بـ 800 جنيه.. أنت بتكلم مين يا عم.

نصائح شريف مدكور لبدائل الأكلات باهظة الثمن؟

- المشروم فيه نفس البروتين للحمة وأرخص بمراحل، وأجنحة الفراخ فيها بروتين عالي جدًا وأرخص جزء في الفرخة، والبيض ممكن يتعمل في أكلات كتيرة ومفيد جدًا، والفول الصويا مفيد جدًا.

كيف يمكن تصحيح وعي الأشخاص عن مفهوم الطب النفسي؟

- الدراما المصرية سواء أفلام أو مسلسلات صورت فكرة ذهاب الناس إلى الدكتور النفسي أنهم ناس مجانين فالناس مابقتش فاهمة يعني إيه دكتور نفسي، والنفس لو تعبت الجسم بيتعب، فالواحد اللي نفسيته تعبانة لازم يعالجها لأنه لو ساب النفسية الجسم هيبوظ، فمفيش حاجة اسمها مش هروح لدكتور نفساني ومافيش حاجة اسمها مش هتعالج نفسيًا، وأنا ضد الأدوية والمهدئات، لكن مع أن الواحد يروح للطبيب النفسي يستشيره لأن المرض النفسي ممكن يؤدي إلى الاكتئاب والإدمان وغيرها.

ولازم الواحد يكون عنده ثقة في نفسه وراضي بكل حاجة ربنا أدهاله وقتها محدش هيحتاج لدكتور نفسي نهائي.

كيف يمكن تحسين الحالة النفسية عند الأطفال؟

- ما تخلهمش يتفرجوا على التلفزيون وما تقعدوش تزعقوا قدمهم، والأب ما يشتمش الأم، والأم ما تهنش الأب، لأن الطفل زي السفنجة بيمتص كل الأشياء اللي حوليه فلو الطفل حوليه بيت كويس وأب وأم متفاهمين هيطلع كويس ولو حوليه أب وأم مش كويسين هيطلع منيل بستين نيلة وأحنا أللي هندفع التمن مش هما.

هل تفضل اللجوء إلى العلاجات الطبيعية والطب البديل؟

- لأ، أنا باخد أدوية لأن الوصفات الطبيعية بتاخد وقت علشان تخفي وأنا مذيع هوا عايز أخف بسرعة لأن الهوا شيء مقدس بالنسبة لي، يعني السنة اللي قبل اللي فاتت عملت عملية كان عندي قطع في القرنية، عملت العملية بنج كلي الساعة 11 بليل وطلعت من المستشفى 1 بليل وتاني يوم كنت على الهوا الساعة 5.

 

موضوعات متعلقة:

شريف مدكور: "برامج الطبخ هي اللي شهرتني بس ماعنديش خلق أطبخ"

شريف مدكور: طريقة تربية الأمهات للأبناء الذكور سببًا رئيسيًا لكثرة حالات الطلاق

شريف مدكور يقترح بدائل موفرة للحمة والفراخ

شريف مدكور: أنا لا أؤمن بـ"الموضة" والبيوت المصرية فقدت هويتها من 70 سنة

شريف مدكور يقترح حل مبتكر للقضاء على التحرش في مصر


قولى رأيك

تابعنا علي فيسبوك