8 نصايح للحصول على بشرة متوهجة ليلة الفرح

بواسطه روضة إبراهيم السبت , 26 مايو 2018 ,11:07 م

8 نصايح للحصول على بشرة متوهجة ليلة الفرح


 

في ليلة العمر بتكون العروسة هي اكتر واحدة محاطة بالانظار من الكل، علشان كده لازم تكون مميزة وبراقة وبشرتها نضرة ومتوهجة ونضيفة وصحية بما فيه الكفاية علشان تظهر في مكياج الفرح بشكل طبيعي ومثالي وجميل وتستعدي لليوم المعهود.

 
اعرفي مع لهلوبة مجموعة نصايح للحصول على بشرة متوهجة للعروس:

1- كلي بطيخ كتير:

من الحاجات الاساسية اللي بتحافظ على نضارة وصحة وتوهج البشرة هي احتواء جسمنا على كمية كبيرة من الميه علشان يكون رطب وبالتالي ده يظهر على جلدنا، وممكن تستمدي الميه من حاجات تانيه غير تناولها بشكل مباشر، زي انك تاكلي بطيخ كتير لانه مصدر قوي لترطيب البشرة، ويجي في المرتبة التانية تناول الجريب فروت والقرنبيط والخس.

2- جهزي نفسك قبل الفرح بفترة:

لازم تستعدي ليوم الزفاف قبلها بفترة، يعني يفضل انك تهتمي ببشرتك من ماسكات وسكراب واستخدام زيوت للتفتيح والترطيب والتنعيم قبل الفرح بـ 3 شهور على الاقل علشان بشرتك تكون مثالية وصحية ومتوهجة يوم الفرح.

3- اهتمي ببشرة وجهك اكتر:

لو كنتي بتعاني من حبوب الشباب، او كان جلد وجهك محروق من الشمس او لونه غامق وعاوزه تفتحي بشرتك، يبقى يفضل تعملي كورس تنضيف عميق للبشرة من الماسكات لعلاج المشكلات اللي بتعاني منها قبل الفرح بكام شهر.

4- تقشير البشرة:

علشان تحصلي على ملمس جلد ناعم زي الاطفال، يبقى لازم تعملي تقشير لبشرتك علشان تزيلي الجلد الميت، باستخدام انواع الاسكراب الطبيعية المعروفة زي السكر وزيت الزيتون.

5- كلي اكل صحي:

لازم تهتمي بوجباتك قبل فترة كبيرة من الفرح، لان الاكل الصحي بيظهر تأثيره على بشرتك وبالتالي بتظهر متوهجة وطبيعية اكتر، وكتري من تناول الاكلات المحتوية على الفيتامينات، واميجا 3 "الموجودة في السمك"، بالاضافة الى انه مفيد للقلب والعين والدماغ والصحة العامة كمان مفيد جدًا للحصول على بشرة صحية.

6- اهتمي بترطيب بشرتك:

لازم تهتمي بالترطيب اليومي لبشرتك سواء في وجهك اوفي جميع انحاء جسمك، مرتين في اليوم على الاقل، وده علشان المناطق الجافة والخشنة والداكنة تكون رطبة ويفتح لونها، زي الكوع والركبتين والقدميين واليدين، وكمان الترطيب بيساعد على اخفاء علامات التجاعيد اللي بتظهر ساعات في وقت الشباب.

7- نامي كويس:

اوقات بتلاحظي انك بتعملي كل حاجة تجعل بشرتك نضرة من ماسكات طبيعية وتناول اكل صحي الا ان لسه بشرتك باهتة وغير نضرة وده بسبب قلة النوم، لازم على الاقل ننام 8 ساعات متواصلة كل يوم علشان نحافظ على بشرتنا صحية وجميلة.

8- تنضيف فرش المكياج باستمرار:

اكيد في الفترة اللي قبل الفرح بتستخدمي مكياج على بشرتك، وعلشان تحفظي على بشرتك جميلة طول الوقت لحد وقت الزفاف لازم تتاكدي انك بتستخدمي ادوات وفرش نضيفة، ولازم تغسليها بالشامبو باستمرار علشان الادوات دي بتكون مليانة بالجراثيم والبكتريا اللي بتضر البشرة مع كتر استخدامها، وكمان ممكن تتسبب في ظهور حب الشباب ونقلها من مكان للتاني.
 
 
موضوعات متعلقة:



قولى رأيك

تابعنا علي فيسبوك