طرق تسهل دراسة الرياضيات لطفلك

بواسطه علياء المحمدى الاحد , 27 مايو 2018 ,9:38 ص

طرق تسهل دراسة الرياضيات لطفلك


تعليم الرياضيات للاطفال مش بالامر السهل وفيه صعوبات كتير بتواجه الاباء والامهات، لكن لهلوبة جيبالك مهارات بسيطة تقدروا من خلالها تعلموا اولادكم الرياضيات بطرق بسيطة وسهلة.

 

- العد:

 

أول واهم حاجة #الطفل يتعلمها من بدري هي العد علشان يعرف الارقام وترتيبها، سواء العد بالتسميع ورا الأم او الأب او عد اي حاجة في متناول يده، المهم انه يعرف الارقام وترتيبها، ساعتها يقدر يجمع ويطرح اسرع من غيره من الاطفال، بعدها ممكن نبني حاجات كتير على ده.

 

- استخدم #الادوات اليومية:

 

البيت فيه كل حاجة انتي محتاجها علشان تعلمي طفلك الحسابات، زراير، اقلام، فلوس، كتب، فواكة..إلخ كل حاجة بنستخدمها يوميًا ينفع تبقى ادوات لتعليم الحسابات، بتسهل الموضوع عليه، والعد اكتر على الطفل من التخيل، وكل ما تنوعت الادوات والاشياء المستخدمة كل ما الطفل استيعابه بقى احسن.

 

- العاب الرياضيات:

 

زي اللي بتتباع في المحلات، مهمتها الرئيسية هي تعليم الرياضيات، اشتري النوع ده من الالعاب لطفلك واجعليه يبدأ يشغل مخه وينشط مهاراته في الحساب.

 

- #المخبوزات:

 

هي طريقة جديدة ومش معتادة في تعليم الطفل الحساب، اعملي معاه بسكويت او كيك او اي مخبوزات في البيت بيتعلم العدد من الخامات المستخدمة وبيتعلم العد من القطع اللي عملتيها وازاي يقسم القطعة الكاملة لنص وربع وتمن وكسور كتير.

 

- خلي الرياضيات حاجة يومية:

 

استغلي اي وقت مع طفلك وأسئليه اسئلة في الحسابات، لو في اشارة اسئليه في كام عربية حمرا، في المحلات اسئليه لو المنتج ده عليه خصم 25% يبقى بكام؟، وانتوا بتاكلوا اسئليه لو اكلنا الربع يفضل كام؟ وهكذا كل الاسئلة دي بتشغل مخه وتطور مهاراته في الرياضيات. 



قولى رأيك

تابعنا علي فيسبوك