أول رد من بثينه علي الحجار بعد الجدل حول فيديو مسيء لوالدها.. ووالدتها تتدخل!
أثارت بثينه علي الحجار، ابنة المطرب الكبير علي الحجار، حالة واسعة من الجدل خلال الساعات الماضية، بعد انتشار مقطع فيديو منسوب لها ظهرت خلاله وهي تدعو متابعيها لتوجيه السباب لوالدها، ما دفعها للخروج عن صمتها والرد على ما تم تداوله.
أول رد من بثينه علي الحجار بعد الجدل حول فيديو مسيء لوالدها
وفي أول تعليق لها، أوضحت بثينه عبر فيديو جديد أن المقطع المتداول تم اقتطاعه من سياقه، مؤكدة أنها كانت تتحدث بشكل عفوي مع أصدقائها داخل حساب خاص، قائلة: "أنا بس عايزة أتكلم عن الفيديو اللي انتشر، عشان أوضح كام حاجة مش هلحق أعمل كل ده دلوقتي، بس أنا كنت على طبيعتي في الفيديو، مش عارفة ليه الناس داخلة تكتب حاجات مفترية، وتقول إنتي مدمنة وطريقتك مش عارفة إيه، أنا داخلة بتكلم مع صحابي فيديو في الأوضة بتاعتي، وكان برايفت أصلا".
وأضافت أنها كانت تتحدث بصدق عن مشاعرها الشخصية، معبرة عن حزنها من طبيعة علاقتها بوالدها، قائلة: "اللي قلته كلام أنا حاساه للأسف، كان نفسي علاقتي تكون كويسة مع عيلتي أو بابايا، بس الغلطة من عندهم، أنا آسفة جدا على الموضوع ده".
وردت بثينة على الانتقادات التي طالتها، خاصة الاتهامات المتعلقة بتعاطيها مواد مخدرة، قائلة: "بتقولوا شكلها مدمنة بطلوا افترى يا جماعة، وبعدين طب ما تساعدوا واللي بيقولوا اشتغلي أنا في فترة مش لاقية شغل وتعبانة، ومريت بحاجات خلتني تعبانة اكتر، ومحدش يعرف صحتي عاملة إزاي ولا هو يعرف على فكرة أي حاجة، بطلوا تظلموا الناس لو مش هتعرفوا تساعدوا، خلاص واللي يقدر يجيبلي شغل اتفضلوا، أنا بكتب وأمثل وأترجم، وبعرف اشتغل، بطلوا تظلموا الناس وأتمنى إني أخد حقي".
وأوضحت أنها تمر بفترة من قلة العمل، داعية من يستطيع مساعدتها في الحصول على فرصة مناسبة إلى التواصل معها، مؤكدة امتلاكها مهارات متعددة في التمثيل والكتابة والترجمة، ومشددة على ضرورة التوقف عن الإساءة للآخرين دون سبب.
تعليق والدة بثينه علي الحجار على الأزمة المُثارة
على جانب آخر، دخلت والدتها الفنانة سحر حسن على خط الأزمة، حيث دافعت عن ابنتها بشدة، منتقدة الهجوم الذي تعرضت له، ومؤكدة أن الفيديو كان خاصًا ولم يكن مخصصًا للنشر أو التداول.
ونشرت سحر حسن صورًا لابنتها عبر حسابها على "فيسبوك"، مشيرة إلى أن ما يحدث يعد تعديًا على الخصوصية، قائلة: "المواقع اللي عمالة تقزقز لب في سمعة البنت ووالدها، ده فيديو خاص لشابة بتفضفض مع صحابها في private accountمش للسرقة ولا للنشر".
كما وجهت رسالة حادة للمنتقدين، قائلة: "وده شكل بثينة الحقيقي والطبيعي واللي هايتاجر أو هايعلي التريند هايعرض نفسه للمساءلة القانونية، واتقوا الله يا ملايكة ياللي قايمين من على السجادة، يا مدعي الشرف والاستقامة".
وكان الفيديو المتداول قد أظهر بثينة وهي تتحدث بسخرية عن ظروفها المعيشية الصعبة، متسائلة عن وضعها رغم كونها ابنة فنان كبير، قائلة: "مش عارفة أنا إزاى عايشة، إحنا عايشين إزاى يا جماعة، أنا مكلتش غير بقسماط من امبارح أنا والقطط"، متسائلة: "هو مش أنا أبويا على الحجار؟!".
كما دعت متابعيها للدخول إلى حساب والدها وسبه، قائلة: "ممكن كلنا ندخل نشتمه على الأكونت بتاعه بليز.. اللى يقدر يعمل كده عنده بوت أكونت أو حاجة، خشوا اشتموا فيه عشان خاطري".
وتبقى الأزمة محل متابعة، في ظل تباين ردود الفعل بين متعاطف مع ظروفها ومنتقد لتصرفاتها، بينما لم يصدر حتى الآن تعليق رسمي من الفنان علي الحجار حول الواقعة.
