شريف مدكور: أنا لا أؤمن بـ"الموضة" والبيوت المصرية فقدت هويتها من 70 سنة

بواسطه إسراء صادق السبت , 24 مارس 2018 ,12:28 م

شريف مدكور


 

الإعلامي شريف مدكور من أبرز إعلاميين البرامج المتخصصة في شؤون المرأة وكل ما يهمها من مطبخ وأزياء وبالطبع الموضة في كل شيء سواء في الملابس أو في فرش البيوت، لذا خلال وجوده في ضيافة "لهلوبة" سألناه عن رأيه في فرش البيوت المصرية حاليًا على الموضة، وكان رده عكس المتوقع.

قال الإعلامي شريف مدكور أنه لا يؤمن بكلمة موضة رغم تخصيصه فقرة لها ببرنامجه، خاصة فيما يتعلق بفرش البيوت، حيث يرى أن البيوت لها شخصية مستقلة لا يجب أن تسير وفقًا لتوجيهات الموضة المتقلبة.

وأوضح مدكور أن بالخارج في دول أوربا لا يتبعون نفس نظامنا في اللحاق بالموضة، وعبر: "المنزل هو المكان اللي بقضي فيه وقت كبير أوي من حياتي، فلازم كل حاجة في البيت بتاعي تبقى مريحة ليا أنا مش للآخرين، من أول الألوان لازم تبقى الألوان اللي انا بحبها، مفيش حاجة اسمها الألوان دي موضة والألوان دي مش موضة أو دي بتضيق ودي بتوسع".

واستكمل: "علشان كده مفيش موضة للبيت، في شخصية لكل بيت، بس إحنا في مصر أغلبيتها ملهاش شخصية للأسف، أحنا فقدنا هوية المنزل المصري من 70 أو 80 سنة، علشان بقت الناس بتمشي على الموضة فبقت كل حقبة في موضة للبيوت المصرية غير متناسبة مع المصريين أصلا".

وضرب شريف مثالًا قائلًا: في الستينات والسبعينات من القرن الماضي، حصلت طفرة وحشة في البيوت المصرية، إن الناس بقت بتاعة مظاهر مع عصر الإنفتاح، فكان لازم أي واحدة بتتجهز كان لازم يبقى في بيتها طقم أبيسون وسجادة شينوا وأوضة سفرة فيها بوفيه ونيش، ومش بتستخدم كل ده لأن مثلا الابيسون بيحتاج بلد برد علشان بيشوك والصالون المدهب مش بيناسب بيوتنا اللي فيها أطفال".

واستطرد: "زمان كان في أوضة مسافرين كان ممكن يتحط فيها حاجات زي دي، بس مع الستينات والسبعينات بقت البيوت صغيرة بقت عاملة زي علب السردين، فبقى العفش مكدس تلاقي الصالون دخل في السفرة في الانتريه وحاطين تليفزيون مع الطقم المدهب".

وعن أكثر ما يزعجه في بيته بشكل شخصي قال: "أنا في بيتي أكتر حاجة تزعجني إن أحط في أوضة النوم تليفزيون أو أي جهاز، أوضة النوم للنوم، بيزعجني إن ممكن ناس يفطروا أو يأكلوا عيالهم على السرير، لأنهم من الأول ما أسسوش البيت بالطريقة السليمة اللي هتخليهم يعرفوا يعيشوا عيشة مرتاحة".  

 

موضوعات متعلقة:

امرأة تسخر من مظهر شريف مدكور ويعلق من الكيماوي

شريف مدكور يصاب بقطع في شبكية العين بعد سرطان القولون

نهال عنبر تزور شريف مدكور بالمستشفى وتطمئن جمهوره عليه

ريهام سعيد تشيد بقوة شريف مدكور لمواصلة عمله بعد إصابته بسرطان القولون


قولى رأيك

تابعنا علي فيسبوك