ملكة بريطانيا تحافظ على رشاقتها بالابتعاد عن المكرونة الايطالية

بواسطه شيرين مصطفى الثلاثاء , 12 سبتمبر 2017 ,10:43 ص

ملكة بريطانيا تحافظ على رشاقتها بالابتعاد عن المكرونة الايطالية


من المعروف ان ملكة بريطانيا، إليزابيث، رغم تقدمها في السن الا انها مهتمة بصحتها بشكل كبير وبتتبع نظام غذائي صحي، لهلوبة قررت تعرفك عليه في السطور اللي جاية: 
 
تبدأ الملكة روتينها اليومي، في انها بتفطر الساعة 9 الصبح أول حاجة بتعملها بتشرب شاي من غير سكر ولا لبن وغالبًا وجبة الفطار بتكون من الكورن فليكس، اللي أحيانًا بتضيفله قطع من المكسرات و الفواكه المجففة زي المشمش، وكتير بتفطر مربى مع قطعة توست.
 
أما وجبة الغداء بتكون عبارة عن قطعة من اللحمة أو السمك المشوي مع الخضار وطبق السبانخ اللي بتعتبرهم فاتح للشهية، كمان بتتجنب النشويات حتى لو بدأت يومها بوجبة غنية بالكربوهيدرات.
 
وعن حفلة الشاي بعد الضهر اللي بتعتبر شيء مقدس عند البريطانيين، فالملكة بتشرب الشاي بجانب وجبة خفيفة من السندوتشات الصغيرة ومقبلات قليلة.
 
أما العشاء فهو في العادة شبه الغدا مع بعض التغييرات، فأحيانًا بتطلب بعض لحوم الصيد زي الغزلان أو سمك السالمون مع المشروم.
 
وكشف كبير طهاة القصر الملكي والمسؤول عن وجبات الملكة إليزبيث، إنها بتكره البطاطس والرز والمكرونة الايطالية، ووضح انها بتعشق الشوكولاتة، رغم إنها لا تفضل تناولها بعد وجبة العشاء، فهي بتستمتع بيها أثناء حفلة الشاي بعد الضهر، بالإضافة لانها لازم يوميًا تاكل ساندوتش المربى وبودنج الخوخ الأبيض اللي بيعتبر من الأكلات المفضلة عندها، كمان بتحب تأكل كلابها فتافيت الكيك.
 
 
موضوعات متعلقة:



قولى رأيك

تابعنا علي فيسبوك