نصائح للحصول على مكياج عروسة رائع لاصحاب البشرة الجافة

بواسطه روضة إبراهيم الجمعة , 20 إبريل 2018 ,8:33 ص

نصائح للحصول على مكياج عروسة رائع لاصحاب البشرة الجافة


تحضير العروسة للفرح بيكون امر مرهق جدًا، لانها بجانب انها بتهتم باختيار الفستان المناسب وتجهيزات الشقة لازم تهتم بتهيأة وتحضير بشرتها ليوم زي ده علشان تظهر مشرقة ومنورة، ولو كنتي من اصحاب البشرة الجافة اكيد بتعاني علشان تظهري ببشرة نضرة مع المكياج، علشان كده لهلوبة هتقولك مجموعة نصايح علشان تظهري باطلالة حلوة بالمكياج للعرايس اصحاب البشرة الجافة.
 

نصايح للظهور بمكياج فرح جذاب للعرايس اصحاب البشرة الجافة:

1- روتين الحفاظ على البشرة:

- تقشير البشرة:

دي اهم واول خطوة لازم تعمليها علشان تتخلصي من الجلد الميت وتظهري ببشرة نضرة، وده لان البشرة الجافة بيتراكم فيها الجلد الميت بشكل اكبر، ولازم تعرفي ان الوجه المقشر بشكل جيد بيظهر فيه المكياج بشكل طبيعي وجذاب.

- تطهير وتنضيف البشرة:

لازم تنضفي وجهك بشكل منتظم ومستمر، ودي نقطة مناسبة لجميع انواع البشرة، ولكن الاشخاص اللي بيعانوا من جفاف الجلد لازم يغسلوا وجههم باستمرار ولازم تتجنبي استخدام الصابون لانها بتزود من الجفاف.

- الترطيب:

لازم كل بنت بتعاني من بشرتها الجافة تحرص على ترطيب البشرة بشكل كويس جدًا بعد التنضيف، ولو بشرتك جافة يبقى بتحتاجي لترطيب بشكل كبير جدًا، احرصي على استخدام الكريمات المرطبة والماسكات اللي بتعطي ترطيب اكبر للبشرة.

2- روتين يومي للبشرة الجافة:

لازم كل يوم قبل ما تنامي تدلكي جسمك كله وبشرتك بخليط مكون من الجلسرين الممزوج بالميه ومضاف عليهم قطرات من زيت الزيتون، الخليط ده بيجعل جسمك رطب وناعم جدًا ومناسب للبشرة الجافة، ولكن مهم الاستمرار على الوصفة دي علشان تلاحظي النتيجة.

3- الدقة في استخدام منتجات ماكياج كويسة:

- اختاري الماركة المناسبة:

ضروري ان العرايس اللي بتمتلك بشرة جافة تختار ماركات مناسبة وغالية من منتجات المكياج اللي بتستخدمها يوم الفرح، وابعدي في اختيارك عن المنتجات اللي داخل في مكوناتها الميه واتجهي للمنتجات الزيتية علشان تتناسب مع بشرتك الجافة.

- اختيار كريم اساس مناسب:

استخدمي كريم الاساس الخافي للعيوب، واللي بيتم تطبيقه بفرش المكياج الصغيرة، دي انسب حاجة للبشرة الجافة.

- احمر الخدود "بلاشر":

استخدمي احمر الخدود الكريمي، وجربيه على بشرتك الاول واختاري اللون المناسب، ولكن الافضل انك تبعدي عن احمر الخدود البودر لانه بيسبب جفاف للبشرة وبيظهرك بشكل وحش جدًا في يوم وفرحة زي دي.

- الحصول على شفاه جميلة:

علشان تحصلي على مظهر شفاه جميلة وجذاب يوم فرحك، احرصي في البداية على تقشير جلد الشفاه علشان تزيلي الجلد الميت، وبعدها لازم ترطيب كثيف للمنطقة دي، وبعدها اختاري لون الروج المناسب ولايق عليكي ويفضل يكون لامع علشان تحصلي على اطلالة شفايف متوهجة وتكون مناسبة مع حدث زي حفل زفافك.

- العيون الجميلة:

استخدمي ظلال عيون كريمية وابعدي عن المنتجات البودرة لانها غير مناسبة مع البشرة الجافة، واختاري لون ظلال عيون وردي او خوخي دي بتجعل بشرتك تظهر وكأنها وردية وبتعطي اطلالة ناعمة ومش بتبين جفاف بشرتك.

- الماسكرا:

احرصي على استخدام الماسكرا المضادة للميه والعرق، وقبلها لازم ترطبي رموشك بزيت الزيتون كل يوم ولحد يوم فرحك.
 
 



قولى رأيك

تابعنا علي فيسبوك