20 فكرة مفيدة تبعد طفلك عنك وانتي مشغولة

بواسطه إسراء صادق الإثنين , 8 أكتوبر 2018 ,9:45 ص

20 فكرة مفيدة تبعد طفلك عنك وانتي مشغولة


ان يبقى وراكي حاجات كتير عايزة تعمليها ومش عارفة بسبب طفلك خاصة لو قبل سن الحضانة، مشكلة بتواجهها  كل أم، ومؤخرًا معظم الامهات بقى اسهل حاجة يعملوها انهم يقعدوا الطفل قدام التليفزيون او يتركوه مع الموبايل وفي الحالتين الطفل بيتضر لان ممكن نظره يضعف او تتسبب بعض المواد اللي بيتفرج عليها بالساعات لتأخر نموه العقلي.
 
علشان كده لهلوبة بتقولك حاولي تقللي عدد الساعات اللي بتتركي فيها طفلك قدام التليفزيون او مع الموبايل، وبتقترح عليكي بدايل تقدري تعوديه عليها لو مشغولة، تبعده عنك وفي نفس الوقت تفيده وتقوي ذاكرته وقدرته على التركيز:
 
1- اعطي للطفل 2 برطمان بهم اي مادة ممكن ميه بس لو في الشتا يفضل تبعدي عنها، ممكن تبقى قطع فوم مثلًا او خرز، واجعليه ينقلهم من برطمان للتاني من غير ما يوقع حاجة، اعمليها قدامه اكتر من مرة وهو اللي بيطلب يقلدك ويجرب، الموضوع بيشغله وكمان بيساعده يتعود يركز علشان مفيش حاجة تقع.
2- ضعي قدامه جرة كبيرة فيها حبوب مثلًا او فوم وفي وسطها لعب صغيرة، وفهميه ان جواها لعب وهو يدور عليها ويطلعها.
3- نقل الميه من علبة لاخرى باستخدام معلقة او عبوة صغيرة.
4- ادخال اي اجسام صغيرة في اي صندوق من فتحة صغيرة، زي ادخال عملات معدنية في حصالته مثلًا.
5- ضعي امامه سلة فيها قطع خشبية باحجام مختلفة، وعلبة او صندوق فيه فتحات تناسب بعض القطع الخشبية فقط، واتركيه يكتشف اي من القطع حجمه مناسب لدخولها من الفتحات.
6- اعطي طفلك قطعة مغناطيس وحاجات مختلفة قابلة للجذب واتركيه يجذبها ويكتشف المغنطة ويلعب.
7- وضع العابه الصغيرة واشياء اخرى داخل زجاجة رقبتها ضيقة.
8- اعطي طفلك مجموعة من المواد المختلفة في الحجم واللون زي الارز والزراير والخرز واي حاجة من بيتك واطلبي منه يفرزهم ويصنفهم حسب كل نوع او لون.
9- قصي له قطع من الكارتون واتركي له لزق وألوان واعملي قدامه شكل واتركيه يكمل ويبتكر.
10- اعطي له سلسلة معقدة واطلبي منه يحاول يفكها، بس بلاش تعقديها اوي علشان يقدر يفكها.
11- بعثري له العابه في اماكن متفرقة واعطي له شنطة واطلبي منه يدور عليهم ويجمعهم في الشنطة.
12- اعطي له ورق واشكال من اي حاجات في بيتك "غطيان- ملاعق- قطع خشبية" وقلم رصاص واتركيه يحاول يرسم اشكالهم على الورق.
13- اعطي له بلونات بألوان مختلفة ومجموعة من الازرار او الارز او الخرز واطلبي منه يحاول يدخلهم جوا البلونات.
14- لو طفلك لسه لم يصل الـ6 شهور ممكن تعطي له طبق بلاستيك ومعلقة واتركيه يطرقهم ببعض.
15- لو في شهوره الاولى لو وضعتي قدامه شنطتين او تلاتة بلاستك بينشغل فيهم جدًا وبيتبسط بصوتهم.
16- اعطي لطفلك مجموعة من البومات الصور يتفرج عليها، الموضوع بيعجبه اوي ومش بيزهق منه وبيتركك وقتها تخلصي اللي وراكي.
17- لو عمره اكبر من سنتين او تلاتة ممكن تديله قفل ومفتاح وتتركيه يجرب قفله وفتحه.
18- ركبي شبكة على علبة بلاستك واعطيه مجموعة من الشفاطات واطلبي منه يدخل الشفاطة من اخرام الشبكة.
19- لو الطفل اكبر من 3 سنوات ممكن تتركيه يجرب بعض الاعمال المنزلية البسيطة اللي بيتحايل عليكي يعملها معاكي لغاية ما تخلصي حاجة تانية مهمة، زي انك تتركيه يجرب مسك المقشة وكنس الارض على قد ما يقدر او يرتب الهدوم حتى لو لم ينجز الشيء على اكمل وجه بس بيتبسط وبيبعد عنك فترة.
20- اخر حاجة معروفة ومكررة بين الاجيال الا انها مش بتبطل وفعلا بتنمي ذكاء الطفل وقدرته على الابداع وهي المكعبات، اتركي طفلك وسط مجموعة منها وهو بيبدع وبيتشغل بشرط انك تخرجيها له في الوقت ده تحديدًا بدل ما تكون متاحة قدامه طول الوقت ويرفضها وقت ما تكوني محتاجة انه ينشغل عنك.  



قولى رأيك

تابعنا علي فيسبوك