درس الامان لاطفالك..ازاي نحميهم من التحرش ونوعيهم ضد الاغراب

بواسطه إسراء صادق الأربعاء , 10 أكتوبر 2018 ,9:51 ص

درس الامان لاطفالك ازاي نحميهم من التحرش ونوعيهم ضد الاغراب


صحيح نتيجة اول استطلاع دولي لآراء الخبراء حول حظوظ النساء في المدن اللي سكانها بيزيدوا عن 10 مليون واللي تم نشره في وكالة "رويترز" كانت ان القاهرة تعد الاكثر خطورة على الستات عالميًا، لكن في الحقيقة في مصر خصوصًا وفي مجتمعاتنا العربية بشكل عام الخطر مش بس على النساء والبنات ده كمان على الأطفال اللي ظاهرة التحرش بهم لو الاعتداء عليهم جنسيا موجودة من سنين طويلة لكن تم الاهتمام بها إعلاميًا مؤخرًا بعد ما في أطفال كتير فارقت الحياة بسبب التحرش والعنف ضدهم زي قصة الطفلة زينة الشهيرة. 
 
علشان كده لهلوبة بتقدم الفيديو التالي لكل أم، وهو عبارة عن "درس الامان" اللي اتعرض في صورة فيلم كارتون قصير ببرنامج الأطفال "بنات وولاد"، واللي بيحتوي على شرح مبسط للأطفال عن ازاي يحموا نفسهم وازاي يميزوا بين الاشخاص العادية واللي ممكن يكونوا عايزين يأذوهم او يقربوا من جسمهم، وده كان في عدة نقاط هي: 
 
- الاماكن الخاصة في جسم الإنسان عند الولد هي الجزء اللي بيغطيه المايوه لما بيروح البحر، وعند البنت هي برضو الاجزاء اللي بيخبيها المايوه. 
 
- مش مسموح ان حد يشوف او يلمس الاماكن الخاصة في جسمنا غير بابا وماما في وقت الاستحمام او لو وجعتنا بس، او الأشخاص اللي هما يوافقوا عليهم زي (خالتو - الدادة - الدكتور..). 
 
- ممكن نطلب من بابا وماما يعملوا معنا قائمة باسماء الناس اللي بنشوفهم ومسموحلهم يشوفوا الاماكن الخاصة في جسمنا في ظروف معينة. 
 
- ممنوع ناخد اي حاجة من حد مش عارفينه وخصوصًا لو بابا وماما مش موجودين. 
 
- ممنوع نروح مع حد مش عارفينه لمكان بعيد، ولوحد قدر ياخدنا بعيد نحاول نبعد بسرعة لاقرب مكان فيه ناس.
 
- ممنوع نسمح لحد مش عارفينه يشيلنا او يبوسنا او يلمس جسمنا ولو حصل نحاول نزعق او نقول لحد كبير بسرعة. 
 
- ممنوع نسمح لحد يفرجنا على صور لناس من غير هدوم او يتكلم معنا عن جسمنا ولو حصل لازم نقول لاء.
 
- لو حصل وفي حد عمل اي حاجة من دي لازم نرجع نحكي لبابا وماما علشان هم اللي يعرفوا يتصرفوا. 



قولى رأيك

تابعنا علي فيسبوك