اعرفي مين مصمم نضارة جميلة عوض في كليب 3 دقات

بواسطه روضة إبراهيم السبت , 21 أكتوبر 2017 ,1:09 م



اللي تابع مهرجان الجونة اكيد شاف او سمع اغنية 3 دقات، للمغني "أبو" والفنانة يسرا الجميلة اللي شاركته الغنا في الحفلة الختامية للمهرجان، وعلشان الاغنية دي حققت نجاح رهيب وكسرت الدنيا على مواقع التواصل الاجتماعي، من وقت المهرجان لحد وقتنا هذا، قرروا يعملوها على هيئة فيديو كليب لطيف، بث روح وبهجة وحالة من الحب بين الشباب.

ظهر في الفيديو كليب نجوم شباب كتير، زي احمد مالك، وجميلة عوض، ونبيل عيسى، وسلمى ابو ضيف، بالاضافة لوجود الجميلة شيرين رضا، ويسرا، والسيناريست تامر حبيب، والمخرج الكبير عمرو سلامة.

الملفت للنظر في الكليب ده، غير جو المكان، والبحر، والرومانسية الموجودة في كل حتة، ان جميلة عوض ظهرت بنضارة  شمس غريبة جدًا، والكل وقتها علق على شكلها، بس مفيش حد كان عارف مين مصمم النضارة غير العادية دي، النهاردة مع "لهلوبة" هتعرفي مين مصممها.


المصمم المصري "عمرو سعد"  اللي عامل بوتيك خاص بيه لتصميم النضارات والمجوهرات المصرية، وبدأ يتعرف مع اول مجموعة نزلها بسبب النجاح الكبير اللي حصل وقتها لمجموعته، ده لانه عمل طفرة في عالم تصميم النضارات الشمسية، والجميل في تصميماته ان كلها يدوية وبيصنعها بنفسه، بالاضافة إلى انه قرر عدم استخدام مسامير في النضارات بتاعته، واعتمد اكتر على المفصلات، ودي ميزة حلوة في نضراته.

اما بالنسبة للمجوهرات اللي بيشتغل عليها، دايمًا نلاحظ ان تصميماتها فريدة من نوعها، وده علشان بيستخدم تقنية تصميم جديدة اتعلمها في ايطاليا، بتعتمد على العودة لاساسيات صناعة النضارات وطرق صناعتها الاولية في الماضي البعيد.

عمرو سعد بيلبس من تصميماته مشاههير العالم، زي مثلًا إليسا صدناوي، و جيسيكا قهواتي، و لانا الساحلي، والمصرية تارا عماد، وغيرهم كتير من المشاهير بيثقوا في شغله.


قولى رأيك

تابعنا علي فيسبوك