احمي ولادك من فيروس روتا القاتل!

فيروس الروتا، من ضمن الفيروسات اللي بتصيب الأطفال أقل من خمس سنين، ومن ضمن الأعراض اللي بتشير لوجوده هو الإسهال، وهو العرض المنتشر، ومنظمة الصحة العالمية بتقول أن كل طفل معرض للإصابة به مرة واحدة فى العمر قبل الـ 3 سنوات، بالاضافة الى ان اعراضه مش بتظهر عند الرضع اقل من 3 شهور.

والأعراض الرئيسية للفيروس هي الإسهال الشديد اللي ممكن يكون سبب فيما بعد للإصابة بالجفاف الشديد، بالاضافة للسخونية والترجيع.

وبينتقل الفيروس غالبًا عن طريق براز الأشخاص المصابين، يعنى لو طفلك لامس أي شيء من أغراض شخص مصاب أو أي قطعة من ملابسه فيها العدوي وارد جدًا انه يتعرض للاصابة، كمان ممكن يتنقل عن طريق الايد، وهنا لازم يكون ليكي دور مهم في التعقيم الدوري لطفلك بعد السلام علي أي شحص أو حتى ملامسة أي شئ من الخارج.

ومن ضمن طرق الوقاية، وجود تطعيم متاح في المراكز الخاصة لأنه غير تابع لوزارة الصحة، ولكنه مهم جدًا للأطفال علشان كده لازم ابنك يحصل عليه، وفيه نوعين منه نوع على جرعتين والثاني علي ثلاث جرعات.

وعلى الرغم من انه فعال جدًا في حماية الطفل من حدوث مضاعفات إلا أنه في بعض الأطفال بيكون عندهم تحسس شديد وبيهدد الحياة، يعني لو كان طفلك بيعاني من نقص الجهاز المناعي أو انسداد الأمعاء يبقي من الاحسن تبعدي عن التطعيم أو تستشيري الطبيب الخاص بيكي الأول.

العلاج:

المضادات الحيوية مش تساعد في علاج المرض أو منع الاصابة بالفيروس، لان مفيش أي مضادات حيوية فعالة، الا ان في حالة ملاحظة الاعراض المصاحبة له زي الاسهال والقيء لازم تستشيري الطبيب المعالج في الحل، علشان تبعدي ابنك عن التعرض للجفاف.