اسعافات اولية لازم كل ام تعرفها

بواسطه رضوى الشاذلى الخميس , 11 أكتوبر 2018 ,9:12 ص

اسعافات اولية لازم كل ام تعرفها


اسعافات اولية لازم كل ام تعرفها، كل بيت فيه أطفال طبيعي انهم يتعرضوا لاي حوادث طفيفة سواء جرح او كدمة او غيرها، المهم ان يكون الأم والأب هاديين وهم بيتعاملوا مع الموضوع وعارفين ايه هى الاسعافات الاولية اللى لازم يعملوها.
 
1- اصابات الرأس
اى كدمة في الرأس لام نهتم بيها ونعرف ايه تأثيرها وهل لها مضاعفات ولا لأ، لانها مكان حساس جدًا، علشان كده لو ابنك وقع على الارض واتخبط فى دماغه اتأكدي ان مفيش اي علامات حمراء على الجلد لانها في الاغلب دليل على الاصابة بارتجاج في المخ، وفي علامات تانية لازم تنتبهي منها لانها لو ظهرت عليه يبقى لازم فورًا يروح للدكتور او المستشفى زي انه ينام اكتر من معدله الطبيعي او بيعاني من الصداع الشديد او الترجيع كل دي اشارات مهمة ان ابنك لازم يتعمل له اشعة فورية ويتعرض على الدكتور.

2- الحساسية الشديدة
دي من ضمن الامراض اللي مهم ان الامهات يعرفوا ازاي يتعاملوا معاها، لانها بتحصل بشكل مفاجىء، ومن علاماتها انتفاخ الشفاه او تحسس في الوجه او الكحة وصعوبة في التنفس، والدوخة والترجيع من علاماتها الخطيرة، والاسهال عرض ممكن يصاحب باقي اعراض الحساسية، علشان كده ممكن تلجأ لحقن الادرينالين ولو مش عندك او الحالة صعبة يبقى زيارتك للمستشفى ضرورية.
 
3- نزيف الانف
على الرغم من انه امر لازم الدكتور يتدخل فيه فورًا، الا ان من الممكن انك تعملي اسعافات اولية لطفلك، زي انك تمسكي الجزء اللين الامامى من انفه وتضغطي عليه جامد ولو اتكرر النزيف تاني ارجعي اضغطي تاني لمدة 15 ثانية، ومهما كانت حالته سواء سيئة او جيدة لازم الدكتور يطمن عليه ويعرف سبب النزيف المتكرر.
 
4- الكسور
لو كانت عظام طفلك حصل فيها التواء او كسر، يبقى لازم تنقليه الاول لمكان امن زي السرير او كنبة مريحة لحد ما تشوفي الوضع كويس، وفي علامات مهمة تقولك اذا كان في كسر، زي الاحمرار او الورم والألم الشديد، حاولي تحركي الجزء المصاب على قد ما تقدري في الاول لكن استشارة الطبيب هنا مهمة.
 
5- الاختناق
بسبب لعبة او اي شىء صلب دخل في فم طفلك، حاولي تجعليه يكح في البداية علشان يخرج اللعبة دي من فمه، لكن لو فشلتي في ده، يبقي الحل السحرى هو انك تقفي وراه وتحضنيه من ضهره وتضغطى بايدك الاتنين على بطنه بقوة علشان يخرج اللي في فمه ويرجع.
 
6- النزيف او الجروح
لو كان فيه نزيف جامد الحل المثالي هو انك تضغطي على الجرح بقطعة نظيفة من القماش، ولو الجرح عميق والنزيف لسه مستمر، هنا لازم تنضفي الجرح كويس بالميه والصابون، وتقفلي على الجرح بضمادة، لكن اذا استمر رغم كل المحاولات يبقى لازم تتصلي بالاسعاف او تروحي للدكتور.
 
7- التسمم
من ضمن علاماته الواضحة والمعروفة هى صعوبة فى التنفس، والترجيع والنعاس، ومن الضروري التواصل مع المستشفى او الدكتور الخاص به خصوصًا لو كانت حالته سيئة جدًا.
 
8- الحروق
العلامات الحمراء على الجلد دي غالبًا حروق من الدرجة الاولى وممكن تتعاملي معاها بهدوء عن طريق استخدام الكريمات المعروفة، اما حروق الدرجة التالتة واللي غالبًا بيتحول لون الجلد فيها للاسود، هنا مهم انه يروح المستشفى، لكن ممكن تبدأي تعرضي مكان الحرق لميه باردة اطول وقت لان ده له دور كبير في تهدئة الألم.

9- التشنجات
اعراضه بتكون غالباً تحديق طفلك او انه يتعرض لحالة ذهول، او حركة لا ارداية للجسم وخصوصًا الذراعين، والساقين، وبيكون في الحالة دي مش عارف يرد عليكي او يتواصل معاكي بأي طريقة، ممكن تكون الاعراض اقل حدة او اكثر من كده لكن كلها بيستدعي تدخلك، في البداية اجعلي طفلك ينام على جنبه، ابعدي عنه اى حاجة ممكن تدخل في فمه لان في الحالة دي ممكن يتعرض لاختناق، لا تقلقي لو الوقت طول غالبا بينتهي بعد مرور خمس دقايق من بداية النوبة. 



قولى رأيك

تابعنا علي فيسبوك