رياضات ضرورية للحامل

زمان كانوا بينصحوا الحامل اننا تحاول ترتاح وتقلل من اي مجهود، لكن مع مرور السنين في دراسات كتير كشفت اهمية ممارسة الرياضة خلال فترة الحمل وفوايدها، ولهلوبة هتقولك الرياضات المناسبة.

1-   المشي:

يعتبر من الرياضات الآمنة طول فترة الحمل، وممكن تمارسيه كل يوم، فهو بيحافظ على لياقتك من غير ما ركبتك تتأذي، ولو كنتي بتمشي بسرعة، فكده انت بتقوي عضلات قلبك.

2-   السباحة:

اطباء كتير بينصحوا الحامل بممارستها، وهي من الرياضات الآمنة خلال فترة الحمل، وممكن تعمليها مرة أو مرتين في الاسبوع، بعد استئذان الدكتور المتابع لحالتك.

3-   اليوجا:

من اهم الرياضات اللازمة لكل حامل، فهي بتقوي عضلات منطقة الحوض، الامر اللي بيسهل عملية الولادة، وبتزود الشعور بالطاقة والحيوية، كمان بتخفف من آلام الضهر، وبعض وضعيات اليوجا والتنفس العميق، بتشجع الطفل على انه يكون في امثل وضعية للولادة.

4-   تمارين الآيروبكس الخفيفة:

لو سجلتي في فصل مخصص للحوامل، هيساعد على التحسين من حالاك النفسية، وتكوين صداقات جديدة، ورفقة سيدات في نفس حالتك، هيطمنك ان كل حركة بتعمليها آمنة ليكي ولطفلك.

5-   تمارين كيجل:

مسؤولة عن تقوية عضلات المثانة والرحم والامعاء، علشان كده هي مفيدة جدا خلال فترة الحمل، لتهيئة جسمك وتدريبه على الاسترخاء والتحكم في عضلات الحوض، والاستعداد للولادة، ممكن تبدأي فيها خلال الشهر السادس من الحمل، وطبعا بعد استشارة الدكتور المتابع لحالتك.

لممارسة التمرين بشكل صحيح، تخيلي انك عايزة تمنعي البول من التدفق او حبس الغازات من الخروج، شد عضلات المهبل بالطريقة دي، بيساعد على التحكم في الدفع والقدرة على التنفس بشكل سليم خلال عملية الولادة، احرصي برده على عدم تحريك رجلك او عضلات اسفل البطن، خلال ممارسة التمرين.