نصايح بسيطة هتحميكي من الجوع والارهاق طول رمضان

بواسطه علياء المحمدى الأربعاء , 30 مايو 2018 ,11:03 ص

نصايح بسيطة هتحميكي من الجوع والارهاق طول رمضان


نصائح بسيطة تحميكي من الجوع والارهاق طول رمضان، رمضان من أهم الشهور اللي لازم الشخص يحافظ فيها على طاقته وجهده لأنه شهر عمل وعبادة كمان، لكن للأسف بعض الناس بتلاقي مشكلة في إنها تحافظ على طاقتها في رمضان نتيجة الجوع ونقص بعض العناصر اللي بننساها على الفطار، وعلشان نبعد عن التعب والجوع طول رمضان هنقولكم على مجموعة نصايح بسيطة تضمن شهر مريح ومليان نشاط، واللي منها:

- اهتمي بالتنفس:

تمرينات التنفس مهمة جدا خلال ساعات الصوم، لأن البطن بتبقى فاضية وفي فرصة كبيرة للتنفس بشكل أحسن، مهم إننا نتنفس من الأنف ونتنفس بعمق وبنظام.

- الرياضة:

تخيلي إنك ممكن تحاربي الجوع والتعب بالرياضة، طبعا الرياضة البسيطة المريحة، زي المشي الخفيف، الحركة هتقلل الاحساس بالجوع وكمان هتساعد الجسم يحافظ على نشاطه.

- النوم:

لازم في رمضان نحافظ على عدد ساعات نوم يرتاح فيه الجسم ويبدأ نشيط ومستعد لساعات صيام طويلة.

- غيري اهتمامك:

لو ركزتي في إنك جعانة وتعبانة هتفضلي حاسة بكده طول اليوم، لكن المخ فيه ميزة هايلة، وهي إنه بيركز في حاجة واحدة بس، فلما تلاقي نفسك حاسة بالجوع والتعب فكري في حاجة تانية بعيدة وانشغلي بيها.

اشغلي نفسك:

رتبي جدول مواعيدك وشوفي هتعملي إيه في الشهر من قبل ما يبدأ بين الشغل والمطبخ والعبادات، لما تفكري في كل الترتيبات دي هتنسي أي حاجة تانية.

- فضلي المياه على الكافيين:

في أي فرصة اختيار بين شرب المياه أو القهوة أو الشاي أو الصودا اختاري تشربي مياه، المياه هتفيد جسمك بكل الطرق وهتقلل الاحساس بالجوع والعطش والارهاق.

- خدي بالك وأنتي بتاكلي:

متحطيش نفسك قدام الأكل على طول، فكري واعملي خطط ويستحسن الخطط دي تبقى وأنتي شبعانة، اعرفي هتاكلي إيه على الفطار والسحور، واختاري أصناف مفيدة وصحية علشان تساعدك تعدي ساعات الصيام بخفة وراحة. 



قولى رأيك

تابعنا علي فيسبوك