نصائح لاختيار ملابس مناسبة لحضور فرح على البحر

بواسطه روضة إبراهيم الاحد , 3 يونيو 2018 ,9:35 ص

نصائح لاختيار ملابس مناسبة لحضور فرح على البحر


 نصائح لاختيار ملابس مناسبة لحضور فرح على البحر، مؤخرًا ظهرت موضة ان العرايس بتعمل افراحها على شاطئ البحر، ودي حاجة جميلة جدًا ان الفرح يكون في الهواء الطلق وعلى البحر والنسيم يطير شعرك ويحسسك بالانتعاش، والرقص على التراب الناعم شئ تاني خالص، وهنا بنبدء نفكر انا لو رايحة احضر فرح في المكان العظيم ده ممكن ألبس ايه بتوافق مع جو البحر، وده اللي هنعرفه مع لهلوبة.

طبعًا العريس والعروسة ملتزمين بلبسهم المعروف الفستان الابيض، والبدلة السودة الانيقة، مع ان ممكن يحصل بعض التغيرات في شكل فستان العروسة زي انه يكون قصير او بسيط اكتر ومش منفوش، ولكنا الحضور لازم يعرف الملابس اللي تليق على المكان ده.

نصائح علشان تعرفي تلبسي ايه لو رايحة تحضري فرح على البحر:

1- مبدأيًا لو في زي معين متفقين عليه العريس والعروسة ومقترح في دعوة الفرح يبقى لازم كل الحضور يلتزم به، علشان شكل الفرح يكون متناسق وجميل وبنفس البساطة والهدوء.

2- يفضل الابتعاد عن الملابس الرسمية عند حضور فرح على البحر، لانها لا تتناسب اطلاقًا مع روح المكان.

3- فرح على البحر يعني في جو حلو، علشان كده يفضل ارتداء الفساتين الخفيفة المصنوعة من القطن او الشيفون او الاورجانزا او الكتان او جورجيت، الاقمشة دي كلها خفيفة وانيقة ومناسبة جدًا.

4- اختاري الالوان الهادية الجميلة، ممكن تستعيني بألوان الباستيل النابضة بالحياة، زي الاصفر والبرتقالي الهادي والموف والبمبي والازرق السماوي، وممكن تكون منقوشة بالورد الجميل.

5- ابعدي عن الفساتين الطويلة او اللي لها ديل، ويفضل ارتداء الفساتين القصيرة بألوان رقيقة لحضور حفل زفاف على شاطئ البحر.

6- الاحذية ذات الكعب العالي بتكون خيار غير مثالي بالمرة لحضور حفل زفاف على الشاطئ، وينصح هنا بارتداء احذية مريحة ويفضل تكون ارضية بلون وشكل يناسب حضور فرح، وممكن تلبسي صندل ولكن كوني حريصة في اختيار شكله علشان يلائم حضور حفل زفاف.

7- احرصي ان الاكسسوارات اللي بتضعيها في شعرك او ملابسك تكون غير مضيئة اوي ولافتة للنظر، وبلاش يكون لونها جريء، لازم تكون اطلالاتك بسيطة بالكامل.

8- فرح في البحر يعني في هوا طول الوقت، علشان كده ممكن تحضري شال خفيف بلون مميز، القطعة دي جذابة جدًا.

9- ومن اهم النصايح اللي لازم تعرفيها وانتي رايحة تحضري اي فرح، هي انه لا يفضل اطلاقًا انك تلبسي اي فستان في طيف من اللون الابيض او درجاته، علشان فستان العروس مميز باللون ده فينصح بالبعد عنه تمامًا في حضور الافراح.

10- ابعدي عن ارتداء الفساتين الشفافة في حضور حفل الزفاف، والقاعدة دي بتطبق على جميع الافراح مش بس المقامة على البحر.

11- لو مش كنتي من وصيفات العروسة، لازم تتاكدي تمامًا انك تبعدي عن ارتداء فستان بنفس اللون اللي ممكن يلبسوه، علشان مش يحصل لغبطة وتكون حركة مش ظريفة منك لو عمليتها عن قصد ومن غير اتفاق مسبق مع العروسة.



قولى رأيك

تابعنا علي فيسبوك