الستات عايزة ايه.. لهلوبة هتقولك

بواسطه إسراء صادق الثلاثاء , 7 نوفمبر 2017 ,10:46 ص

بين محاولاتها لارضاء المجتمع ورضى نفسها، واحساسها انها بتجري طول الوقت بتسابق الزمن وبتحارب في مليون جبهة، وده حال معظم الستات في مجتمعاتنا العربية وده يجعل نسبة كبيرة من النساء مش عارفين هم عايزين إيه، وفي المقابل كان سؤال محير الرجالة والعلماء أحيانًا، وهي الستات فعلا عايزة إيه؟

ونظرًا لسرعة انتشار أي موضوع في حياتنا الايام دي على مواقع التواصل الاجتماعي ومناقشتها وقتلها بحثًا، الأمر أصبح تريند على "تويتر" "#الستات_عايزة_إيه"، هاشتاج دون عليه البنات والستات أحلامهم البسيطة جدًا وحاولوا يريحوا الرجالة شوية ويكشفوا عن شوية من متطلباتهم المشروعة جدا في الحياة.

التدوينات أغلبها كان بين حلم الشغل الكويس والفلوس الكتير والاستقلالية والسفر والحرية وبين حلم الرزق بـ"راجل حنين" زي ما بيقولوا، و"حب حقيقي مع راجل بيقدر وبس"، والنوعين بيحلموا بحياة كريمة، من تدوينات الهاشتاج؛ في بنات قالت: "الستات عايزه ايه غير راجل يحميها ولايبكيها"، "تخرج وتتفسح وتسافر🚄 وتعمل شوبنج وتتبسط"، "حد يدلعها و يفرفشها و يحسسها انها ملكة".

وفي اللي علقت ساخرة: " ماانت لو مهتم كنت عرفت لوحدك😏😏😂😂😂😂"، "الستر والصحه وسندوتشين شاورما سوري وواحد بانيه و2 برجر وبيبسي الهضبه الكبير"، "تتجوز الي ياكلها مش العره الي يقولها انتي تخنتي"، واللي قالوا:" عايزه إيه غير تشتغل وتنجح وتمشي بأمان في الشارع"، "عايزه ايه غير السفر طبعاااااا"، "تبقى ناجحة وتحقق كل أحلامها والمجتمع يبطل يخنقها"، "عايزة شغل وفلوس كتير وتعيش بحرية والرجالة يسيبوها في حالها".

بعض الإحصاءيات عن النساء حول العالم:

- من كل 3 نساء في العالم تعرّضن لعنف جسدي أو جنسي على الأقلّ لمرّة في حياتهنّ وغالباً ما يكون ذلك من قبل شريكهنّ الحميم.

- 14% من البنات في العالم العربي اتجوزوا قبل الوصول لسن الـ18 سنة، حسب ما أقر موقع reliefweb التابع لمكتب الأمم المتحدة.

- وأضاف الموقع ان حوالي 92% من البنات والنساء في مصر بين الـ15 والـ49 اتعرضوا للختان، لكن كمان بتشير آخر الإحصاءيات ان نسبة الختان انخفضت 13% عند الفتيات بين 15 و17 سنة بالمقارنة مع العام 2008.

- وفي دراسة نشرتها مؤسسة تومسون رويترز رتبت الدول حسب أفضليتها لحياة المرأة وكانت جزر القمر في المقدمة ثم سلطنة عمان وبعدين الكويت وقطر من حيث المعاملة داخل الأسرة والتداخل في المجتمع والدور السياسي.

- ومن أيام قليلة ظهر اول استطلاع دولي لاراء الخبراء حول حظوظ النساء في المدن اللي سكانها اكتر من 10 مليون واللي نشرته وكالة الأنباء رويترز أيضًا وقال ان القاهرة تعد الاكثر خطورة على الستات عالميًا وتحتل المركز الاول.