في 10 أسابيع استعدي للفرح من غير غلطة

بواسطه علياء المحمدى الاحد , 27 مايو 2018 ,9:29 ص

في 10 أسابيع استعدي للفرح من غير غلطة


 

فرحك قرب ومش عارفة تبدأي منين ولا تعملي إيه؟ وطبعا عايزة تبقي في أحسن شكل.

ايه رأيك ان في خلال 10 أسابيع بس قبل الفرح، تقدري تظبطي نفسك تمامًا وتكوني مستعدة للفرح، ده اللي هنقولك عليه في السطور الجاية:

 

- الأسبوع الأول، البشرة:

ابدأي ببشرتك، عالجي كل المشاكل اللي فيها سواء حبوب أو مناطق غامقة أو رؤوس سودا، الجفاف، الالتهابات، عالجي البشرة في كل مكان مش راضية عنه في أول أسابيع التحضير للفرح.

 

- الأسبوع التاني، كريم الأساس:

بعد ما اتطمنتي على بشرتك، وعالجتي كل مشاكلها، ده وقت إنك تشوفي كريم الاساس المثالي ليها، من حيث الدرجة والنوع سواء سايل أو بودرة، ولا هتستخدمي  مرطب، الموضوع مش بسيط، محتاج تجربة واختبارات.

 

- الأسبوع التالت، الشعر:

ده وقت اهتمامك بتاجك وصحته وقوته وشكله سواء هيبان في الفرح، أو لو محجبة الاهتمام بالشعر مش اختيار، اهتمي بتغذية شعرك قبل الفرح واتجنبي أي غلطات في التعامل معاه زي التنشيف أو الفرد أو استخدام الكيماويات، علشان على الفرح يبقى شعرك صحى وبيلمع وقوي.

 

- الأسبوع الرابع، الحواجب:

مش كفاية ترسميهم وتحدديهم، في الأسابيع الستة اللي جايين اهتمي بحواجبك مع بقية اهتماماتك وغذيهم بالزيوت ومتحاوليش تشيليهم بالملقاط أو تهذبيهم  بأي شكل علشان يوم الفرح لما ترسميهم يبقى شكلهم صحي وحلو.

 

- الأسبوع الخامس، الماسكارا:

المكياج مش لازم يبقى يوم الفرح علشان تتفاجئي بشكلك، جربي أنواع الماسكارا اللي تناسبك، واتعرفي على الأنواع وفعاليتها كويس في الفترة دي اللي قبل الفرح.

 

- الأسبوع السادس، الشفايف:

اهتمي بجمال شفايفك ورطبيها واختاري لون الروج ونوعه اللي هتحبي تستخدميه في الفرح بإنك تحاولي تتخيلي الشكل العام هيبقى إيه.

 

- الأسبوع السابع، بروفات الشعر:

قبل الفرح بشهر، ده وقت تجارب تسريحات الشعر وبروفات المكياج، حطي لنفسك كذا اختيار وكذا شكل وخلي حد متخصص يجربهم عليكي.

 

- الأسبوع الثامن، المساج:

بعد كل التعب والارهاق في التحضيرات، أنتي محتاجة دلوقتي قبل الفرح بـ3 أسابيع للاسترخاء والراحة، روحي مكان تعملي فيه مساج وسبا علشان ترخي أعصابك.

 

- الأسبوع التاسع: أسنانك:

فاضل أسبوعين على الفرح، اهتمي بأسنانك بقى، زوري الدكتور علشان يعالج الأسنان لو محتاجة علاج، أو ينضفها ويبيضها علشان ضحكتك تنور في الفرح.

 

- الأسبوع العاشر: الأكل:

أكل صحي يساوي عروسة سعيدة، قبل الفرح بأسبوع كلي أكل صحي واهتمي بصحتك كويس علشان الأكل الصحي بيحافظ على الجسم في أكتر من ناحية.

 

- قبل الفرح بأسبوع: لازم تقصي أطراف شعرك.

- قبل الفرح بأربع أيام: أكدي على مناطق البكيني بالواكس أو الليزر وغيرهم.

- قبل الفرح بتلات أيام: ركزي في ترطيب بشرتك.

- قبل الفرح بيومين: اعملي مساج للجسم بالكامل.

- قبل الفرح بيوم: اعملي باديكير ومانيكير الضوافر واعملي ماسك مرطب للبشرة والشعر وادخلي نامي. 



قولى رأيك

تابعنا علي فيسبوك